ຊົມເຊີຍເຈົ້າຫນ້າທີ່! 1ປີສາມາດຕ້ານ-ສະກັດກັ້ນສິນຄ້າໜີພາສີໄດ້ຫຼາຍກວ່າ 5 ພັນຄະດີ
ໃນໜຶ່ງປີຜ່ານມາຂະແໜງພາສີທົ່ວປະເທດ ໄດ້ເອົາໃຈໃສ່ຈັດຕັ້ງປະຕິບັດຕາມພາລະບົດບາດວຽກງານຂອງຕົນຢ່າງຕັ້ງໜ້າ ໂດຍສະເພາະວຽກງານຕ້ານ ແລະ ສະກັດກັ້ນການລັກລອບສິນຄ້າໜີພາສີ ເຫັນວ່າສາມາດຈັບຜູ້ລັກລອບນຳເຂົ້າສິນຄ້າໜີພາສີໄດ້ຫຼາຍກວ່າ 5 ພັນຄະດີ.
ອີງຕາມບົດສະຫຼຸບຕີລາຄາການຈັດຕັ້ງປະຕິບັດວຽກງານປີ 2017 ຂອງຂະແໜງພາສີທົ່ວປະເທດໄດ້ໃຫ້ຮູ້ວ່າ: ໃນປີ 2017 ຜ່ານມາ ຂະແໜງພາສີທົ່ວປະເທດໄດ້ມີຄະດີເກີດຂຶ້ນ ທັງໝົດ 5.044 ຄະດີ ໃນນັ້ນ ພາຫະນະ ຈຳນວນ 4.067 ຄະດີໄມ້ ຈຳນວນ 252 ຄະດີ ຄະດີທົ່ວໄປ ຈຳນວນ 725 ຄະດີ ສາມາດຈັດເກັບລາຍຮັບໄດ້ຄືນທັງໝົດ 34 ຕື້ກວ່າກີບ ໃນນັ້ນ ຄ່າປັບໃໝຈຳນວນ 14 ຕື້ກວ່າກີບ ຍັງຄ້າງສະສາງ ຈຳນວນ 226 ຄະດີ (ພາຫະນະຈຳນວນ 83 ຄະດີ ໄມ້ຈຳນວນ 99 ຄະດີ ຄະດີທົ່ວໄປ 44 ຄະດີ).
ສຳລັບປີຜ່ານມາ ມີສະພາບພົ້ນເດັ່ນ ຄື: ກວດຢຶດພາຫະນະລັກລອບ ທີ່ນະຄອນຫຼວງວຽງຈັນ ແຂວງຫຼວງພະບາງ ສະຫວັນນະເຂດ ຈຳນວນ 121 ຄະດີ ກວດຢຶດໄມ້ລັກລອບສົ່ງອອກຜິດກົດໝາຍທີ່ດ່ານພາສີສາກົນນາເພົ້າ ແດນສະຫວັນ ນ້ຳພ້າວ ນ້ຳກັນ ລະໄລ ພູເກືອ ແລະ ບໍ່ເຕັນ ຈຳນວນ 186 ຄະດີ ສົມທົບພາກສ່ວນກ່ຽວຂ້ອງກວດກາຢຶດຢາເສບຕິດຢູ່ແຂວງບໍ່ແກ້ວ ແລະ ຫຼວງນ້ຳທາ 2 ຄະດີ ເປັນປະເພດຢາບ້າ ຈຳນວນ 3 ລ້ານກວ່າເມັດ ສ່ວນດ່ານພາສີສາກົນຂົວມິດຕະພາບ 1 ກວດຢຶດເງິນສົດນຳເຂົ້າເກີນລະບຽບທະນາຄານກຳນົດ 8 ຄະດີ ເປັນຈຳນວນ 15 ລ້ານກວ່າບາດ ສັດນ້ອຍມີຊີວິດ 1 ຄະດີ ອາວຸດປືນ ແລະ ກະສຸນ ຈຳນວນ 2 ຄະດີ ແລະ ກວດຢຶດການລັກລອບຂົນສົ່ງຊິ້ນສ່ວນສັດຫວງຫ້າມ 2 ຄະດີ ປະເພດນໍແຮດ ຈຳນວນ 18 ທ່ອນ ຜ່ານດ່ານພາສີສາກົນສະໜາມບິນວັດໄຕ.
ไม่มีความคิดเห็น